Скршените родители пред цели две децении го „закопале“ синот, млад и перспективен шпански доктор. Иако тој никогаш не бил пронајден, потрагата била завршена бидејќи не давала никакви резултати. Па така, Карлос Санчез Ортиз де Салазар од Севиља во 2010 година и официјално бил прогласен за мртов, на 15 годишнината од неговото исчезнување.
Во 1995 година Карлос имал 26 години и боледувал од депресија. Дваесет години подоцна, пред две недели, неговите родители примиле вест на која не се надевале ниту во најлудите соништа: „Вашиот син е жив“.
Имено, двајца берачи на печурки наишле на него и неговиот шатор во Тоскана во Италија. Тој им се претставил и им рекол дека е Шпанец кој се вика Карлос и кој во таа шума живее веќе 20 години. Им го покажал и својот прастар пасош и им објаснил дека нема смисла да кажат во институциите каде се наоѓа, бидејќи штом ќе заминат, ќе ја промени локацијата, пишува Daily Mail.
Тие сепак контактирале со шпанскиот завод за исчезнати личности кој многу брзо ги лоцирал родителите на Карлос. Тие веднаш одлетале во Италија за да го пронајдат, но Карлос веќе не бил таму.
„Нам, како родители, ни е многу важно да знаеме дека е жив, но загрижени сме за неговото здравје. Ги почитуваме неговите желби и неговата слобода, но нема да се смириме додека не успееме барем да го прегрнеме, па макар и за последен пат. Ние само сакаме тој да е добро“, изјавила неговата мајка.
