Од денеска во попладневните часови, низ чешмите во градскиот водовод протече матна вода. Според официјални лица, од дозволени 1,5, матноста изнесува околу 60. Според д-р Ратко Давидовски, специјалист по хигиена во Центарот за јавно здравје во Тетово, нема простор за паника, бидејќи испитувањата покажале дека водата бактериолошки е исправна и содржи доволни количини хлор. Давидовски уверува дека набргу водата ќе се избистри.
Зголемената матност на водата произлегува од изведување градежни работи околу нов ски лифт на Попова Шапка. Работите се сопрени и се очекува водата да ја добие првобитната чистота. Дотогаш, сепак, важи забраната за пиење вода од градскиот водовод во Тетово.
