Околу 100 наши државјани има во Авганистан – Талибанците влегоа во Кабул


Министерството за надворешни работи попладнево соопшти дека во Авганистан се уште има околу 100 наши државјани, но засега сите се на безбедни локации.

– Според последните информации кои ги добивме, компаниите кои ги ангажираат работниците, не се соочуваат со потешкотии и имаат резервирано сопствени летови за евакуација на нивните работници, а дел од нив веќе се префрлени во некои од соседните земји и нивниот трансфер дома не е спорен, информира МНР.

avganistan

Во последните 24 часа, на дежурните телефони во МНР се јавиле неколку граѓани кои имаат роднини или пријатели во Авганистан и се интересирале за состојбата таму, но не побарале асистенција за нивно извлекување.

Од МНР нагласуваат дека будно се следи ситуацијата и дека некои држави веќе изразиле подготвеност при евентуални организирани летови за евакуација да бидат опфатени и македонските државјани.

– Од вчерашната инструкција на нашата дипломатска мрежа за контакт со соодветните министерства за надворешни работи во земјите на нивно покривање, денес дел од амбасадите и конзулатите веќе се стапени во контакт и некои од пријателските земји изразија подготвеност при евентуални организирани летови за евакуација да бидат на располагање и за граѓаните на Република Северна Македонија, се наведува во соопштението од МНР.

Талибанците денеска влегоа во предградијата на Кабул и велат дека чекаат „мирен трансфер“ на авганистанската престолнина, откако ветија дека нема да го заземат со сила. Според официјални извори, талибанските претставници преговараат со претседателот Ашраф Гани за предавање на власта.

Очевидци тврдат дека речиси немало никаков отпор кон напредувањето на Талибанците, кои им наредија на своите војници да се воздржат од насилство и да дозволат безбедно напуштање на градот за сите кои сакаат да заминат.

Талибанскиот портпарол за Ал Џезира во Катар изјави дека тие очекуваат мирен трансфер на Кабул, но одби да даде детали за евентуални преговори со владата.

Share Button
MK News

Автор инфо

No comments yet.

Остави коментар

UA-33057274-1