Премиерот Зоран Заев денеска ги повика граѓаните на Македонија да излезат на референдумот и да гласаат според своето убедување, а тој самиот се обврзува дека ќе го поддржи нивниот избор. Сега е време на храбри чекор за татковината, сега е време за патриотски одлуки, порача Заев.
„Собранието го утврди датумот на референдумот, денот кој ќе ја означи прествртницата во Македонија. Секој има шанса да донесе голема одлука, сега е време за одлука. Нашиот народ е народ кој знае да избере иднина. Секој е должен да ја преземе одговорноста за својата иднина и за иднината на својата земја“, рече Заев, порачувајќи им на граѓаните дека нивниот глас е нивно прав о и дека не треба да дозволат некој да им го одземе.
Тој јавно се обврза дека ќе го поддржи нивниот избор, но рече дека силно верува во одлуката на граѓаните.
„Македонскиот народ вечно ќе биде македонски народ и вечно ќе зборува македонски јазик. Уверен сум дека со вашиот глас на референдумот нема да дозволите некој Македонија да ја држи во заложништво“, изјави Заев.
Не сакам ни да помислувам што ќе се случи доколку не биде исполнет цензусот, треба за пример барем тоа да го постигнеме. Ако не сега, кога? Ова е историска одлука. Оваа одлука можат да ја донесат само граѓаните. Драго ми е што преку врвната алатка во демократијата тоа граѓаните ќе го направат, изјави премиерот Зоран Заев, на денешната прес конференција во Владата.
Сепак тој навести дека доколку цензусот не биде постигнат, институциите ќе го имаат последниот збор.
-Може и граѓаните да не гласаат, поради неинформираност или од други причина да одлучат да останат дома. Во таков случај ја пренесуваат одлуката на институциите. Со сите правници се консултирав и дојдовме до заклучок дека тоа всушност значи така. Но не сакам ни да зборувам што доколку биде така. Нема ако. Овој пат на референдумот одговорноста ќе ја преземеме за себе и своето семејство, и ќе излеземе да гласаме онака како што мислиме. Опција има за или против. Но нема опција дали да излеземе или не. Треба да излеземе ако сме вистински патриоти – порача тој.
Тој испрати апел до граѓаните своето учество на референдумот да го сфатат сериозно.
-Сите знаеме дека огромно мнозинство ќе бидат за, и таа волја на граѓаните треба да ја почитуваме. Уверен сум дека ќе биде успешен со повеќе од 50 отсто излезност, и огромно мнозинство ќе гласаат за европската иднина. Нема друга алтернатива за Македонија. Можеме да бидеме различно партиски и религиски определени, богати или сиромашни, но сите сме еднакви граѓани со еднакви права и обврски во оваа земја. Сега правата и обврските доаѓаат заедно. Убеден сум до небото дека ќе излезат да ја кажат одлуката. Убеден сум дека ќе успее референдумот, а потоа ние ќе го послушаме нашиот народ – додаде тој.
