Српскиот претседател Александар Вучиќ во однос на референдумот во Македонија денеска во Москва изјави дека не е на него да се меша во внатрешните работи на некоја земја, но оти Европа мора да биде поодговорна.
„Не е мое да се мешам во внатрешните работи на една земја. Стравувам и ми се чини дека некои луѓе од светот не потценуваат нас балканските народи и мислат дека можат се, мислат: ќе видиме ако може со народот, ако не, тогаш не со народот, ќе се обидеме со притисок врз пратениците, ако не може ниту тоа, не е важно, тоа мора да биде така“, изјави Вучиќ, пренесуваат српските медиуми.
Тој рече дека го почитува договорот меѓу Македонија и Грција, но исто така луѓето од Европа и светот да покажат почитување кон малите народи. „Европа мора да се постави поодговорно“, рече Вучиќ.
