Американски турист силно ги налути жителите на Фиренца кога случајно го скршил прстот на непроценливата статуа на Богородица, стара 600 години, која се наоѓа во музејот.
Неименуваниот 55-годишен турист од Конектикат, се обидел да го спореди својот прст со оној на мермерната статуа во Museo dell’Opera del Duomo и случајно го скршил. Чуварот се обидел да го запре, но веќе било предоцна. Туристот, кој бил на одмор со сопругата и уште една двојка, бил престрашен и почнал да се извинува, страхувајќи од тужба и огромна казна за уништување на вредниот споменик на културата.
Оваа скулптура во 14 или 15 век ја создал фирентинскиот уметник Џовани д`Амброџо.
Тимоти Вердон, Американец на чело на Уредот за света уметност и црковно културно наследство на таа музеј-катедрала, го осудил однесувањето на својот сонародник. Навел дека оштетниот прст не бил оригинален, туку излиен подоцна, како и тоа дека не е сигурен колку ќе чини поправката, ниту дали е таа воопшто возможна.
„Во светот како нашиот, фундаменталното правило при посета на музејот е заборавено, а тоа гласи: Не ги допиран уметничките дела!“, вели тој. Голем број вредни уметнички дела во Фиренца се држат добро чувани и далеку од јавноста, а во музеите се поставени копии.
Портпаролот на музејот изјави дека засрамениот турист имал среќа и нема да биде казнет, ниту кривично гонет, а музејот веќе ангажирал тим реставратори на свој трошок. Споменатата статуа била кршена веќе три пати во минатото.
