Поранешната специјална обвинителка Катица Јанева во својот исказ пред судот потврди дека побарала укинување на притворот за осомничените во предметот “Империја” во кој е и рекетираниот бизнисмен, Орце Камчев.
Рече дека до судот СЈО доставило предлог за укинување на притворот за осуммина осомничени во предмети кои ги водело специјалното обвинителство, но одлуките дали притворот ќе им се замени со куќен притвор ги донел судот.
-Одговорно тврдам дека никогаш не сум влијаела врз судии од Кривичниот суд или Апелациониот суд ниту сум ги “тресела од гаќи”, изјави Јанева.
Давајќи ја својата одбрана во предметот Рекет каде е обвинета за злоупотреба на службената положба, објасни дека обвинителството со кое таа раководела поседувало огромен број материјални и вербални докази за “Империја”. Ја пофали обвинителката Лиле Стефанова која го работела предметот и рече дека од првиот момент па се до денес ја имала нејзината поддршка и доверба. Смета дека Стефанова била пример како треба да постапува еден јавен обвинител.
Инаку на крајот од рочиштето кога за сведок беше повикана обвинителката Стефанова, нејзината колешка Јанева ја нарече “ороспија”
СЈО кое го водев четири години, од тогашната опозиција доби 660 илјади фајлови со незаконски прибавени прислушувани материјали. Да знаете што јас се знам од тие 660 илјади фајлови, сигурно не би била тука, но јас никогаш не дозволив тие да излезат во јавност. Се надевам дека тие фајлово се уште се во СЈО, изјави поранешната специјална јавна обвинителка Катица Јанева на денешното судење за случајот „Рекет“ во кој е обвинета за злоупотреба на службената положба и овластување.
Поранешната шефица на СЈО Катица Јанева кажа дека фајловите биле слушани по три часа на ден и сите материјали биле сработени.
– Согласно законот за СЈО јавните обвинители имаа целосна слобода и независност во водењето на предметите и постапките, рече Јанева.
Нагласи дека таа не водела ниту еден од случаите, што биле отворени од СЈО и немала ниту еден предмет во нејзината канцеларија.
Во работата како СЈО сум одлучувала исто како што сега одлучува Јавното обвинителство, а замислете држена сум девет месеци во притвор за давање мислење за промена на мерка притвор на Орце Камчев, изјави денеска во судот Катица Јанева, каде сведочи за предметот „Рекет“ во кој е обвинета за злоупотреба на службената положба и овластување.
Посочи дека Јавното обвинителство за овој предмет го променило мислењето за притворот на Зоран Милевски, без притоа да се променат ниту една од околностите и тоа не се смета за злоупотреба и пречекорување на овластувањата.
– Од тука сметам дека обвинението за кое повеќе од девет месеци сум држена во притвор е целосно неосновано. Замислете за мислење кое сум го дала сум држена во притвор, изјави Јанева.
Според неа, СЈО не привилегирало никого, туку Врховниот суд ги привилегира сите тие кои ги гонеле, а нив ги направил неовластен тужител.
– Чекам да видам дали една од тие истраги ќе биде завршена. Зошто ЈО влезе во СЈО. Барем да го земеше предметот „Империја“ и да го изанализираше. Да видеше дека Орце Камчев не бил никогаш привилегиран. Зошто сите наредби за вештачење се повлечени. Што мислеше, а што најде. Не, важно беше што одлуки сум поништила, изјави Јанева.
Не е точно, рече Јанева дека, дека му го вратила пасошот на Камчев, како што стои во диспозитивот на обвинението. Тврди дека само има дадено мислење за издавање привремена патна исправа, а судот носи одлука.
– Во моите обвиненија никаде не пишува дека се чека вештачење и потоа се повлекува, туку се почитуваат сите човекови права и постапки, изјави Јанева.
Нагласи дека никогаш не понудила привилегии на Јордан Камчев, и дека целиот случај е монтиран и граден врз основа на еден исказ – на Јордан Камчев.
– Ако судот ги прибавеше доказите од „Империја“ ќе видеше дека никогаш не му била понудена никаква привилегија или својство на заштитен сведок. Ќе видевте дека тој самиот доаѓа во СЈО и бара да соработува, изјави Јанева.
Прашана дали примила парични средства за давање мислење за промена на мерката притвор со куќен притвор и враќање на времената патна исправа на Орце Камчев, Јанева рече дека најодговорно тврди оти од никого никогаш не примила пари за давање привилегирана состојба во предметот „Империја“.
Поранешната шефица на СЈО Катица Јанева пред судот кажа дека е невина и затоа бара да биде ослободена.
