До Република Македонија помош за справување со последиците од невремето во Скопско и во Тетовско досега понудиле бројни пријателски држави. Првите понуди за помош пристигнаа од државите од поширокото соседство како Албанија, Бугарија, Босна и Херцеговина, Србија, Косово, Турција и Хрватска, а понуда за помош се уште пристигнува, информираат од Министерството за надворешни работи.
– Во моментов се работи на специфицирање на конкретните потреби на Република Македонија во справувањето со вонредно настанатата состојба, по што ќе биде и официјално побарана меѓународна помош -, посочија од МНР.
Република Македонија, посочуваат од МНР, викендов ја зафати најголемата елементарна непогода во последната деценија. Во поплавите во Скопје животот го загубија 21 лице и над 70 се повредени. Владата на Република Македонија денеска прогласи и ден на жалост. Силите на Министерството за внатрешни работи и АРМ, заедно со Црвениот крст на Република Македонија и граѓани-волонтери сеуште се на терен и работат на расчистување на теренот. Воедно, започнати се бројни хуманитарни акции за оштетените семејства, потсетуваат од МНР.
