Денес попладне и во вечерните часови од север ќе се спушта посвежа воздушна маса која на повеќе места ќе предизвика нестабилно време со пороен дожд и грмежи, особено во северните и источните делови. Локално има услови процесите да бидат поинтензивни во форма на невреме со засилен ветер и појава на град.
Дневните температури ќе опаѓаат, почнувајќи од северните делови (за околу 5 степени), а во крајните југоисточни делови сеуште ќе се задржи многу топло, така што ќе бидат во интервал од 31 до 40 степени.
Во Скопската котлина попладне и во вечерните часови ќе има пороен дожд и грмежи, краткотрајно и со засилен ветер и можна појава на град.
Утре ќе преовладува променливо и свежо време со локални врнежи од дожд, кои попладне ќе престануваат. Ќе дува и засилен северен ветер, а температурата ќе опадне за околу 10 степени.
Во вторник сеуште ќе дува повремено засилен северен ветер, а ќе започне период на стабилно време со постепено покачување на температурата, која кон крајот на работната недела ќе биде во интервал од 29 до 37 степени.
