Лидерот на ВМРО-ДПМНЕ Никола Груевски четврти пат вчера попладне ја доби довербата од пратениците за состав на нова влада откако за неа гласаа 77 пратеници, а 6 беа против и ниту еден воздржан. Но, првпат во изминативе осум години владата на Груевски добива нов мандат, без присуство на најголемата опозициска партија СДСМ во собраниската сала. Поддршката ја доби, разбирливо, од своите пратеници, како и од пратеничката група на владиниот партнер Али Ахмети.
Против гласаа пратениците на ДПА, а Роза Топузовска-Kаревска од ЛДП не беше во салата за време на гласањето. Единствен пратеник кој го оправда своето отсуство на седницата за избор на владата беше лидерот на ДПА, Мендух Тачи. Груевски во експозето ги повтори петте стратешки точки за наредните четири години врзани за економскиот раст, вработувањето, евро-атлантската интеграција, борбата против корупцијата, меѓуетничките односи.
Груевски ќе води влада составена од петмина вицепремиери и 20 министри, од кои седум се без ресор.
– Владата е подготвена да го продолжи грчко-македонскиот дијалог врз основа на веќе утврдените стратегија и принципи. Владата нема да прифати промена на Уставот со цел промена на уставното име на Република Македонија и нема да прифати идеи и предлози што би го загрозиле македонскиот национален идентитет, засебноста на македонската нација и македонскиот јазик. Владата нема да дозволи какво било решение за спорот, кој го наметна Грција, да биде прифатено без претходно за тоа да се изјаснат граѓаните на референдум, а притоа мнозинството граѓани што ќе излезат на тој референдум да се согласат со можното решение – рече Груевски за името.
Приоритети во надворешната политика, истакна Груевски во експозето, се членството во НАТО, почнување на преговорите и членство во ЕУ, особено во делот на исполнување на Kопенхашките критериуми, усвојување на законодавство од ЕУ и негова примена.
