Основачот на Викиликс, Џулијан Асанж, се согласи да се изјасни за виновен по едно обвинение за заговор за добивање и откривање на доверливи документи за национална одбрана на САД, според поднесоците во Окружниот суд на САД, Северните Маријански Острови.
Така пишува во новообјавените документи на федералниот суд.
Според условите на договорот, обвинителите на Министерството за правда ќе бараат казна од 62 месеци – еднакво на времето поминато на Асанж во затвор во Лондон додека се бореше против екстрадиција во Соединетите држави.
Бидејќи времето кое ќе го бараат е еднакво на времето кое тој веќе го мина во притвор, договорот за признавање вина би значел дека неговата затворска казна е истечена, што ќе му овозможи на Асанж веднаш да се врати во Австралија, неговата родна земја.
Договорот за признавање вина сè уште треба да биде одобрен од федерален судија, но Асанж беше ослободен од затвор во Велика Британија во понеделникот наутро, според Викиликс.
„Џулијан Асанж е слободен. Тој го напушти затворот Белмарш утрото на 24 јуни, откако таму помина 1.901 ден. Високиот суд во Лондон му одобри кауција и тој беше ослободен . Од аеродромот Стенстед во текот на попладневните часови, се качи во авион и ја напушти Велика Британија“, се вели во соопштението на Викиликс.
JULIAN ASSANGE IS FREE
Julian Assange is free. He left Belmarsh maximum security prison on the morning of 24 June, after having spent 1901 days there. He was granted bail by the High Court in London and was released at Stansted airport during the afternoon, where he boarded a…
— WikiLeaks (@wikileaks) June 24, 2024
Дополнително, објавено е видео на кое се гледа како црно комбе патува по автопатот, проследено со снимка како Асанж се качува во авион.
Федералниот судија на Северните Маријански Острови закажа сослушување за пресуда за во среда наутро, соопшти тамошниот Окружен суд на САД. Обвинителите на Министерството за правда побараа судот да ја одржи постапката истиот ден, бидејќи Асанж инаку веројатно би се спротивставил да стапне на континенталниот дел на САД за да се изјасни за виновен, се вели во писмото на обвинителот.
Судот на островите се наоѓа во близина на Австралија, чиј државјанин е Асанж и се очекува да се врати во Австралија по завршувањето на судењето, соопштија обвинителите.
Обвинителите, исто така, му рекоа на судијата дека „очекуваат обвинетиот да се изјасни за виновен за обвинението … и дека судот ќе го осуди на тоа дело“.
Асанж беше обвинет од американските власти поради објавувањето на доверливи воени досиеја обезбедени од поранешната воена разузнавачка аналитичарка Челзи Менинг во 2010 и 2011 година.
Американски официјални лица тврдеа дека Асанж го охрабрил Менинг да добие илјадници страници нефилтрирани американски дипломатски телеграми кои потенцијално ги компромитираат доверливите извори, извештаите за значајни активности поврзани со војната во Ирак и информации поврзани со затворениците во Гвантанамо.
