Бугарскиот премиер Бојко Борисов добил смртна закана, јавуваат бугарските медиуми. Писмо со негова фотографија, куршум и заканувачка порака стигнала на адреса на бугарскиот премиер во владата.
Од неговиот кабинет потврдија дека постои таква порака, но одбија да ја коментираат.
Борисов за медиумите изјави дека не е загрижен, зашто знае дека тоа е одговор на неговата посветена борба со корупцијата и криминалот.
Медиумите потсетуваат дека минатата недела тој откажал неколку јавни настани од различни причини.
Бугарскиот премиер минатата недела нареди да се запрат сите сомнителни јавни набавки, меѓу кои и изградбата на дел од автопатот „Хемус“, вреден половина милијарда евра.
Борисов добивал закани и додека бил на функцијата директор на бугарската полиција.
