Додека сите жени лудуваат по него поради неговиот изглед и стил на облекување, неговите пријатели и блиски познаници тврдат дека тој е “многу повеќе од убава личност“ и дека со својата работа го заслужи успехот кој што го постигна. Се прашувате за кого станува збор?
Веројатно никогаш немало да ви падне на памет дека станува збор за лидерот на Сириза и актуелен премиер на Грција, Алексис Ципрас.
Тој е роден во Атина во 1974 година, студирал градежништво на Националниот технички универзитет во Атина, а завршил и постдипломски студии по урбано и регионално планирање. Ципрас, исто така, работел како градежен инженер во градежната индустрија.
Како средношколец тој и се приклучил на младинската организација на комунистичката партија КНЕ, додека за време на универзитетските студии тој станал дел од обновеното лево крило на движењето.
Во 1999 година, тој е избран за секретар на младинска организација на Синаспизмос, позиција на која остана до 2003 година.
Во 2004 година беше избран за член на Централниот политички комитет на партијата, а со тоа и на Политичкиот секретаријат, каде бил одговорен за образование и млади.
Две години подоцна, во октомври 2006 година, Ципрас е избран за советник во општината на градот Атина,откако освои 10,51 отсто од гласовите. Во февруари 2008 година беше избран за лидер на партијата Синаспизмос (Коалиција на левицата, движењата и екологија). Во октомври 2009 година е избран за пратеник во Парламентот под Сириза (Синаспизмос и другите партии на левите организации) и го презеде водството на парламентарната група на партијата.
Во декември 2010 година, лидерот на Сириза беше избран за заменик-претседател на Европската Партијата на левицата, која во декември 2013 година го номинираше за кандидат за претседател на Европската комисија.
Ципрас живее со партнерка и е татко на две деца.
