Да не дозволиме најубавите денови да ни се претворат во лоши спомени, апелираше на денешната прес конференција министерот за здравство, Венко Филипче, кој ја информираше јавноста за состојбата со коронавирусот во државава.
Филипче порача граѓаните да не излегуваат од домовите без некоја посебна потреба после 18:00 часот и да нема собири по домовите и викендичките.
„Состојбата со Ковид е стабилна, иако и натаму има голем број на хоспитализирани и заразени лица. Слободни кревети има во континуитет, што значи дека делот на хоспитализацијата добро се менаџира. Иако R0 факторот е под нулата, тоа не смее да не опушти. Во однос на вакцините, подготовката се одвива со одлична динамика. Активни сме на 3 фронта, прво Ковакс системот преку кој набавивме во 833.000 дози. Во петокот разговаравме со грчкиот колега, па дел од првата количина ќе ни припадне и нам преку Грција, а третата опција е преку Европската канцеларија кај нас. Уште еднаш повторувам дека вакцините ќе бидат бесплатни за сите. Апелирам да не се паѓа на лажни вести, бидејќи вакцините се безбедни. Примарната цел е заштита на населението. Комисијата предложи нови мерки, а денес Владата ги прифати. Забрана за организирање новогодишните настани, за претстојните верски празници да нема групирање, а угостителските објекти како што е познато ќе работат до 18. часот. Апелираме и да не се излегува по 18 часот доколку не е неопходно“, посочи министерот за здравство Филипче.
