Министерот за здравство, Венко Филипче, денеска повторно ги посети повредените во трагичната автобуска несреќа кај Ласкарци и изјави дека ќе се изврши хируршка интервенција на млада девојка која е хоспитализирана на КАРИЛ.
Нејзината нога е тешко повредена, и можеби ќе биде ампутирана.
-Се одлучува како ќе се продолжи третманот, ногата е згмечена и постои можност да и биде ампутирана. Конзилијум од доктри одлучува што ќе се прави, рече тој.
Четворица од пациентите хоспитализирани на скопските клиники се во тешка состојба, а двајца се вклучени на респираторни машини. Имаат повреди на главата, но во моментов не е потребна операција.
Ова го изјави денеска министерот Филипче кој ги посети повредените.
Во Клиничкиот центар се наоѓаат осум пациенти, од кои четворица се на Клиниката за анестезија, еден на Трауматологија, еден на Неврохирургија, трудницата на Клиниката за гинекологија е во добра состојба, а еден е хоспитализиран на Торакална хирургија.
Синоќа бил извршен оперативен зафат на 14-годишно момче и на 40-годишник.
-Кај оперираното момче беше утврдена повреда на црниот дроб, сега тоа е санирано, додека кај 40-годишниот пациент повреда на тенкото црево, по што е направена ресекција. Тие се сега на сопствено дишење и нивната состојба е сосема добра. Двајца од пациентите овде се на респиратор уште првиот момент на пристигнување, имаат доминантна повреда на мозокот и коските на лицето. Кај едниот има и контузија на белите дробови. И двајцата се политрауматизирани, едниот е во доста лоша состојба, но времето ќе покаже. За сега интервенција не е потребна, рече денеска директорот Христијан Костов.
