Громовите кои ја опустошија Хрватска во циклонот кој го доби прекарот Колинда, велат метеоролозите, се продолжение на интензивно празнење од атмосферата кое трае цел август.
Тоа празнење е, меѓутоа, и до трипати поголемо отколку во последните години. Мерната станица Блитзортунг, на пример, само на подрачјето на Пожега измерила трипати повеќе громови отколку лани.
– Олуите во последните две години се малку поретки, но грмотевиците се посилни и поекстремни – вели инженер Бојан Франц од факултетот за електроника и сметководство. Тој и колегите работат во лабораторија со висок напон и го одржуваат системот за лоцирање на громовите во Хрватска. Со помош на сензори распоредени во Загреб, Ријека, Сплит, Дубровник, Задар и Блато на Корчула се следат и бележат громовите за метеоролозите, ХЕП, војската. И тие забележале оваа и минатата година значајно повеќе удари на гром, пишува 24sata.
Соларниот физичар Тод Хоексем верува дека силните грмотевици имаат врска со промените на Сонцето кои се случуваат секои 11 години.
– Во моментов на Сонцето доаѓа до замена на магнетските полови што ќе влијае и на Земјата. Магнетските олуи пренесени до нас од најблиската ѕвезда ќе ја нарушат земјината ионосфера и поради тоа би можело да дојде и до нагли промени на времето – вели Хоексем.
Тоа може лесно да влијае на формирањето на облаци, олуја и на зголемен удар на громови, проценува физичарот. Ионосферата се наоѓа на околу 85 км висина па нагоре, а облаците со громови се формираат на околу 10-15 км висина па ниту метеоролозите од ДХМЗ не можат со сигурност да проценат како тоа ќе се одрази на подрачјето на Хрватска.
