Забележана е змија во близина на кејот на Вардар во населбата Карпош 4, реагираат граѓаните на социјалните мрежи.
По овие фотографии се шири паника бидејќи како што велат граѓаните тие не знаат дали змијата е отровна или не е. Посебно по информацијата дека во Неготино жена била касната од змија отровница. 
Според информациите Неготинка била касната од змија во текот на вчерашниот ден и вечерта била пренесена на Инфективна клиника, изјави денеска за МИА доктор Диме Коцев, директор на Општа болница Кавадарци.
Средовечната жена била касната попладнето, иако носела ракавици, бидејќи, најверојатно работела на нива, но во болницата се јавила во 21 часот.
– Жената ја примивме во болницата, доби серум и на почетокот немаше некои посебни симптоми. Но, по околу два часа имаше визуелни халуцинации. Не сакавме да ризикуваме и во придружба на анестезиолог ја препративме на Инфективната клиника во Скопје, поради можни задоцнети реакции, рече Коцев.
Тој упати апел до населението за внимателност и нагласи дека отровот кај змиите е најсилен во овој период.
