Грчкото Министерство за надворешни работи денеска соопшти дека го повикало на консултации својот амбасадор во Австрија, ден откако во Виена беше одржана конференција на министрите за внатрешни и надворешни работи на земјите од Западен Балкан на тема мигрантската криза, а на која грчки претставници не беа повикани.
Шефот на грчката дипломатија Никос Коѕиас го повикал денеска грчкиот амбасадор во Виена со цел „да се обезбеди зачувување на пријателските односи меѓу двете држави и народите на Грција и Австрија“, се наведува во соопштението на Министерството, пренесува Танјуг.
Грција поради својата голема морска граница со Турција и близината на грчките острови на грчкиот брег стана главна точка од каде влегуваат стотици илјадници луѓе кои бегаат од војни и сиромаштија во своите земји и се надеваат на подобар живот во Европа.
„Јасно е дека со големите проблеми на Европската Унија не може да се избориме со помош на мислите, менталитетот и вонинституционалните иницијативи кои потекнуваат од 19-от век. Таквите дела би можеле да ги поткопаат темелите и процесот на европското обединување“, предупредува Министерството.
