Бразилската полиција почна потрага по амбасадорот на Грција во Бразил, Киријакос Амиридис, кој последен пат е виден во понеделникот во близина на Рио де Жанеиро, каде со семејството бил на одмор.
Автомобилот на амбасадорот денеска бил пронајден во Рио. Во него имало само еден изгорен човечки труп.
Телевизијата Глобо јави дека останките се испратени во лабораторија на експертиза, каде форензички експерти спроведуваат истрага, за да го утврдат идентитетот на најденото тело.
Последен пат Амиридис е виден жив во понеделникот во Нова Игуаку, во пошироката околина на Рио, каде бразилската полиција го пронашла и автомобилот. Возилото на грачкиот амбасадор е најдено под еден од подвозниците на главниот пат што води кон Рио де Жанеиро.
Амиридис и телефонирал на својата сопруга од стан во Нова Игуаку и притоа и рекол дека излегува од домот. Повеќе никому се нема јавено.
Полицијата смета дека е малку веројатно оти станува збор за киднапирање, за да се добие откупнина, затоа што досега никој се нема јавено за да бара пари или нешто друго.
Амиридис почнал со дипломатска кариера во 1985 година. Од јануари оваа година е на функција амабсадор во Бразил. Бил амабсадор во Либија (2012-2016) и од 2001 до 2004 година бил конзул во Рио де Жанеиро.
