Многу често, вториот карцином се открива како резултат на честите контролни прегледи што пациентот ги прави за време на следењето на веќе излекуваниот карцином, предупредуваат лекарите
Не е само една мака… Ни тоа што некој се разболел од еден вид карцином не е никаква „гаранција“ дека нема да заболи од второ малигно заболување. Има случаи пациенти што заболеле од еден вид карцином, да се разболат и од друго малигно заболување, кое воопшто не е поврзано со првото. Лекарите велат дека иако ретко, во практиката се соочуваат и со вакви пациенти, пишува Дневник.
– Се случува, најверојатно, некакво „откочување“ на имунитетот и пациентот повторно се разболува од рак, ама на друг орган и неврзано со првата болест, а некогаш дури и од трето малигно заболување, кое исто така се појавило независно од првата дијагноза. Во мојата досегашна практика како хирург имав 10-ина такви случаи. Токму во последните две-три недели дојде на преглед пациент кај кого уште во старт дијагностициравме два различни карцинома – предупредува д-р Митко Kараѓозов, тораковаскуларен хирург од болницата „Аџибадем Систина“.
Тој потврдува дека, за жал, се намалува и возраста на која се јавуваат овие случаи.
Така, неодамна во оваа Kлиничка болница кај многу млада пациентка, која има само 24 години, а која само што ~ се израдувала на својата првата рожба пред неколку месеци, ~ бил дијагностициран рак на двете дојки. По направените дијагностички процедури се случил нов шок – била утврдена уште една злокобна дијагноза – карцином и на матката. Лекарите се борат за животот на оваа пациентка, чие интензивно лекување е во тек.
