Македонската младинска ракометна репрезентација по вчерашната победа над Италија вечерва ја ,,растури,, Грција со 30:22 во квалификациите за пласман на Европското првенство за младинци во Австрија.
Носени од публиката македонските ракометари стигнаа до вредна победа која ги однесе на чекор до пласманот на Европското првенство.
Избраниците на селекторот Зоран Петковски, одиграа беспрекорно во одбраната која ја предводеше одличниот голаман Филип Ивановски. Нападот, во поголемиот дел од мечот го предводеа Филип Талевски и Мартин Манасков.
Талевски постигна седум, Манасков пет, а по три гола реализираа Јован Талевски, Дрогишки, Маџовски и Поповски.
В недела ќе се одигра последното коло во кое Македонија ќе игра со Исланд од 19 часот, а претходно ќе се сретнат Грција и Италија.
