Поранешната портпаролка на Обвинителството на Хашкиот трибунал, Флоренс Артман тврди дека поранешниот претседател на некогашна СРЈ и на Србија, Слободан Милошевиќ сам се труел со лекот „рифампицин“, со цел да си ја влоши здравствената состојба за да биде пуштен да се брани од слобода, а потоа да побегне во Русија.
Артман во интервју за хрватскиот неделник „Експрес“ истакна дека Милошевиќ сам се труел и оти лекот некој му го доставувал во ќелијата.
Земајќи го тој лек, кој се користи за лекување лепра, Милошевиќ го поништил дејството на лекот за висок крвен притисок.
– Од тоа лесно можел да умре, но тоа не му била целта, туку само сакал да си ја влоши ситуацијата. Милошевиќ знаел што зема, бидејќи од тој лек урината е со сина боја и јасно е дека тоа секако го забележал – наведе таа.
Според Артман, стратегијата на Милошевиќ била да ја избегне пресудата, со цел да не биде запаметен во историјата како претседател на држава одговорен за геноцид.
