Дваесет и три годишниот С.П. од Лозово се бори за живот на КАРИЛ по сообраќајна несреќа која се случила синоќа на магистралниот пат Велес – Штип во близина на село Сарамазлино. До несреќата дошло кога мопед со кој управувал С.П. се превртел.
По несреќата момќето заедно со неговиот сопатник на мопедот, 16-годишник исто така од Лозово се пренесени во Медицински центар Велес за укажување на медицинска помош, каде што кај сопатникот се констатирани телесни повреди, а на С.П. му е констатирана тешка телесна повреда.
МВР информира дека поради сериозноста на повредата е пренесен и задржан на понатамошно лекување во Клинички центар „Мајка Тереза“ во Скопје на КАРИЛ.
Увид на местото на настанот извршила екипа од Полициска станица Свети Николе.
