Тетовката Достана Димитриевска, која заедно со сопругот, сестрата, нејзиниот маж и детето оделе на свадба, настрадала кога силен порој удрил во автомобилот и го превртел на обиколницата, пишува Утрински.
Достана со нејзиниот сопруг Злате со автомобил „опел“ заминале на свадба во едно од селата што најмногу настрадаа во поплавите. Во автомобилот имало уште еден брачен пар (сестра и зет на покојната) и нивното дете. Според соговорниците, сите заедно оделе на свадба кај блиска роднина на загинатата. Неофицијално се зборува дека тие присуствувале и на чинот на венчавање во црква во селото, а потоа се упатиле на веселбата во една од скопските кафеани. Но, за жал, не успеале да стигнат на свеченоста. Ги зафатил голем порој со наноси од тиња, кал и камења. Некаде на обиколницата, силна вода удрила во автомобилот и го превртела. Први излегле сопружниците Достана и Злате, но водата ги разделила. Тој бил извлечен од некои спасители. Другите двајца сопатници се здобиле со повреди, но од полесна природа.
Злате Димитриевски е познат сообраќаен полицаец во Тетово. Во бракот со Достана имаат три деца, од кои две веќе возрасни.
