Сите фискални сметки издадени на граѓаните од 15 ноември до крајот на 2014 година ќе учествуваат во наградната игра „Фискална во рака – награда без мака“, што ја организираат Министерството за финансии и Државната лотарија на Македонија.
Почетокот на наградната игра вчера го означи министерот за финансии Зоран Ставрески, кој истакна дека за да им излезе на граѓаните во пресрет, Министерството решило во лотаријата да учествуваат и фискалните сметки издадени по 15 ноември кога беше објавена наградната игра.
Наградниот фонд е збогатен – до крајот на 2014 година ќе бидат доделени три стана и исто толку дуќани, сите во Скопје, девет автомобили, како и ваучери во вредност до 3.000 до 60.000 денари. Ваучерите се поделени во шест категории и тоа аудио и видеоопрема, бела техника и мали кујнски апарати, мобилни телефони, фотоапарати и опрема, компјутери и компјутерска опрема.
