Јулиан Влад, кој раководеше со озлогласената тајна полиција на Романија, Секуритате за време на комунизмот, почина на 86-годишна возраст, јавија романските медиуми, повикувајќи се на тврдење на негов поранешен колега.
– Влад почина денеска по тешко боледување. Пред извесно време, тој му се исповедал на свештеник, изјави генералот во пензија Петру Неџиу за телевизијата Антена 3.
Јулиан Влад се приклучи на Комунистичката партија по Втората светска војна. Тој беше назначен за шеф на Секуритате во 1987 година и го задржа местото до револуцијата во 1989 година, која стави крај на комунистичкиот режим во земјата.
За време на бунтот беа убиени околу 1.100 лица. Влад тврдеше дека им наредил на своите сили да не отвораат оган.
Во 1990 година, тој беше осуден на 25 години затвор за неговата улога во сузбивање на немирите, но, по четири години беше ослободен.
