Француската полиција го пронајде бездомникот, кој украде 500.000 евра од канцеларија на компанија на парискиот аеродром Роаси, но не и украдените пари.
Како што јави АФП, тој тврди дека по кражбата бил киднапиран и киднаперите му ги украле парите, што тој претходно ги земал. 
На бездомникот, кој е на возраст oд околу 50 години, денеска му беа презентирани обвиненијата.
Тој бил приведен сосема случајно при проверка на идентитетот ноќта во вторникот спроти средата, во засолниште за бездомници во Сен-Сен Дени, северно од Париз. Кај него не биле најдени никакви пари.
Кражбата се случи на 8 декември, кога бездомникот додека пребарувал по кантите на аеродромот, видел дека е отворена вратата на канцеларијата на компанијата „Лумис“, која е специјализирана за собирање на прометот на продавниците и рестораните на аеродромот и банкоматите инсталирани на терминалите.
Во канцеларијата немало никој, но имало вреќи со пари и бездомникот грабал две од нив и се оддалечил од местото. Во двете вреќи имало 496.000 евра.
Пред Судот бездомникот призна дека ги украл парите, но тврдеше дека неколку дена подоцна бил киднапиран и однесен надвор од реонот на Париз за да открие каде се парите. Откако го открил местото, киднаперите му ги земале парите. Бездомникот одбива да каже каква и да е информација за киднаперите.
На бездомникот му е одреден притвор.
