Членовите на Комисијата за ревизија на проектот „Скопје 2014“ кои ги ангажираше Општина Центар утврдиле дека имало голема „разлика“ во сумите кои се давани за реализација на спомениците, а дека се пречекорени првите пресметки за вредноста на еден објект, пишува Нова Македонија.
Во случајот со споменикот на Никола Карев, пред Собранието, кој е изработен во бронза, во документацијата пишува дека е изработен од мермер и дека чини 45 милиони денари, што било многу над реалната вредност за еден таков споменик во бронза.
– Споменикот на Никола Карев според документацијата и договорот е изведен во бронза. Основниот договор бил дека вреди 5 милиони денари, но подоцна со одлука на градот е донесено ново решение за измена и дополнување на претходното по кое вредноста се зголемува на 45 милиони денари. Образложението е дека овој споменик треба да се изработи во мермер“ – ова е само дел од ревизорскиот извештај на Слаѓана Тасева и Драган Малиновски за проектот Скопје 2014.
Централната власт финансирала најголем дел од спомениците и префрлала пари во општина Центар, а ниту еден закон не го одобрува тоа. На тој начин дури 58 милиони евра се префрлени за спомениците од проектот „Скопје 2014“, велат од комисијата за ревизија.
