Фатално заврши илинденскиот викенд за младите свршеници, кои вчера си заминуваа од Охрид.
29 годишниот Дарко од Прилеп, доктор по професија го загуби животот во тешката сообраќајна незгода што синоќа околу 19 часот се случи на магистралниот пат Охрид- Кичево во близина на селото Ботун. Од силниот удар на возилото Пежо 206 , кое го управувал Дарко , тој починал на лице место. На тешките повреди на патот за болница му подлегнала и неговата 25 годишна пријателка Билјана од Тетово, фармацевт по професија, која седела на седиштето позади него, пишува Канал 5.
Со потрес на мозокот и скршеници , но надвор од животна опасност во болницата Свети Еразмо хоспитализирана е неговата вереница, исто така докторка од Тетово.
Сообраќајката се случила во момент кога возачот на пежото од засега непознати причини преминал на спротивната лента и дирекно се судрил со џип GMC, со американски ознаки во кој патувало семејство од Кичево.
Семејството од Кичево, родители со две деца, доаѓале на одмор во Охрид. За среќа тие поминале со мали повреди и ќе бидат пуштени на домашно лекување.
