Мајка и син се тешко повредени по тешката сообраќајна несреќа што синоќа се случи на патот Удово Демир Капија. Во сообраќајната несреќа се судриле автомобил и два камиони.
Од МВР за Нетпрес информираа дека во сообраќајната несреќа учествувале автомобил со германски регистарски ознаки и два камиони со полуприколки. Во несреќата со тешки телесни повреди се здобиле возачот на автомобилот БМВ, 31-годишниот И.С. и сопатничката, 63-годишната Н.Х.С..
Foto – Kurir.mk
Според МВР двајцата тешко повредени се германски државјани, а дел од медиумите веќе објавија дека се работи за етнички Турци кои живеат и работат во Германија, а синоќа биле на пат кон татковината.
Повредените биле пренесени во велешката болница. Мајката имала повреди на главата, а синот бил со повеќе скршеници. Поради тежината на повредите, двајцата биле префрлени во Ургентниот центар во Скопје на КАРИЛ.
Камионите биле управувани од македонски државјани. Првиот камион „сканија“ со полуприколка бил со прилепски регистарски ознаки и со него управувал 61-годишниот Н.С. од Прилеп, а со вториот камион, исто така со полуприколка, со кавадаречки регистарски ознаки управувал 19-годишниот М. Ѓ. од Кавадарци.
Од МВР посочуваат дека сообраќајната несреќа се случила синоќа околу 21. 50 часот по што сообраќајот бил целосно во прекин некаде до полноќ, а потоа до 3.20 часот изутринава се одвивал наизменично. Оттаму потенцираат дека утрово сообраќајот е нормализиран.
