Џереми Стемпер планира втора свадба, бидејќи неговата сопруга не се сеќава на нивната прва свадба. 21-годишниот Американец сака да ја изненади својата сакана со совршена втора свадба, бидејќи таа го изгубила помнењето по сообраќајна несреќа и не може да се сети на ниту еден момент од нивниот свадбен ден.
Џастис Стемпер преживеала сообраќајна несреќа само неколку седмици по свадбата и воопшто не помни дека стапила во брак, иако многупати ги гледала фотографиите од специјалниот ден.
„Тоа е исто како да одиш во странство и да не разбираш што ти зборуваат. Многу е збунувачко“ – рекла 20-годишната девојка.
Џереми започнал да развива романтични чувства кон Џастис кога имал само 10 години, но парот влегол во врска во средношколските години.
„Нашата прва свадба беше прекрасна и совршена, но овој пат сакам Џастис да биде одушевена. Таа навистина го заслужува тоа“ – рекол Џереми, кој преку донации се обидува да создаде совршен свадбен подарок за Џастис.
Новата свадба ќе се одржи на 1 август, кога парот ќе ја прослави и првата годишнина од бракот.
