Отказ, кривична пријава и парична казна за директорката на градинката „Детска Радост“, Светлана Јанкова.
Постапката за нејзино разрешување веќе ја отпочнал градоначалникот на Гази Баба, додека пријавата од санитарниот инсекторат, која треба да биде спроведена до јавното обвинителство, е поради загрозување на здравјето и сомневање за акутно труење со храна. Јанкова ќе биде должна да плати и дополнителни од 1000 до 1500-тини евра, казни од агенцијата за храна и од министерството за труд и социјала. Кривична пријава и парична казна од 5 илјади евра има и за градинката како правно лице, пренесува Алфа.
Централната кујна на градинката ќе биде затворена се додека не се добијат негативни резултати и од ново – земените брисеви од 5 лица – вработени во кујната и од негователките. Готвењето во кујната ќе продолжи кога негативни ќе бидат и дополнителните анализи на примероците од работните површини и опремата во кујната.
Директорката Јанкова за казните против неа слушна од медиумите и затоа не сакаше да ги коментира.
Инаку, во меѓувреме вкупниот број на дечиња со симптоми на труење се искачи на 16. Досега кај 6 од нив е потврдена салмонела, од кои едно дете е само преносител на бактеријата. 4 дечиња сеуште се хоспитализирани на Инфективната клиника.
