Судот на правдата на ЕУ во вторникот пресече дека Директивата која беше обврзувачка за компаниите и провајдерите да ги чуваат податоците за период не помал од шест месеци и не подолг од две години, треба да се укине, бидејќи на тој начин се кршат правата на граѓаните на приватен живот и заштита на нивните лични податоци
Директивата за чување на информации во врска со активностите на корисниците на телекомуникациските услуги во ЕУ е издадена по терористичките напади врз Њујорк, Мадрид и Лондон, кога загриженоста за безбедноста на граѓаните го потисна стравот од нарушување на нивната приватност, а антитерористичките служби тврдеа дека тие податоци им се неопходни за спречување на нови напади. Но, откако американскиот аналитичар Едвард Сноуден во јавноста ги изнесе деталите за сеопфатното и неселективно следење на европските граѓани, прашањето околу приватноста на граѓаните повторно е на агендата на европските законодавци и судовите.
Од давателите на телекомуникациски услуги Директивата бара да ги чува информациите за користење и употребата на фиксни и мобилни телефони, пристап на интернет, е-мејл и интернет телефонија и истите да ги ставаат на располагање, на барање на овластени владини агенции за истражување заради докажување и казнување на тешки кривични дела и тероризам.
И во Македонија се прислушува
Македонија иако не е членка на ЕУ, сепак, делови од оваа Директива се имплементирани во Законот за електронски комуникации (ЗЕК), поточно во Глава 18 “Безбедност и интегритет на јавните електронски комуникациски мрежи и услуги и заштита на личните податоци”. Посебно во членовите 175 до 178 е опишано, како и кои податоци треба да се задржуваат од страна на операторите и која е постапката органот надлежен за следење на комуникации во согласност на законот за следење на комуникации да добие таков тип на информации.
– Во членот 175 се наведува дека операторите се должни да ги обезбедат сите неопходни технички услови за да овозможат следење на комуникациите во нивните мрежи, како и на сопствен трошок да обезбедат и одржуваат опрема, соодветен интерфејс и да воспостават електронски комуникациски водови за пренос до овластениот орган за следење на комуникации, со цел да се овозможи следењето на комуникациите во нивната мрежа – се вели во ЗЕК.
Според македонскиот ЗЕК, операторите се должни да ги задржат податоците од клиентите за период од 12 месеци од датумот на извршената комуникација.
Vecer
