Во турска серија што оди во ударен термин, тринаесетгодишно девојче сакаат да го мажат, а кога тоа бега, го затвораат во самица и му даваат јаже самото да се обеси?! Кога не сака да се обеси, го „кршат“ од ќотек и сево ова оди во крупни кадри и во попладневните часови на телевизија. Во истата турска серија, таткото е присилен да го турне девојчето од карпа во вода додека друг човек му држи пиштол вперен во главата. Сето тоа се емитува под етикетата „програма за целата публика“.
Вакви и слични застрашувачки сцени од тепање, насилство и пиштоли секојдневно ги вџашуваат децата преку сериите што се емитуваат на националните телевизии. Дека влијанието на ваквата програма е големо, покажува и тоа што децата во градинките сѐ почесто комуницираат со жаргонот на турските серии и емотивно се соживуваат со страдањата на главните ликови. Психолозите со кои контактиравме, сведочат за ситуации кога децата се поврзуваат со турските серии до толку, што ги имитираат во градинките, а некои се плашат „мајка им да не ги омажи за непознат чичко“ како во серијата.
Психологот во првата детска амбасада „Меѓаши“, Јана Зенговска, вели
– Овие содржини можат да влеат страв кај децата, проблеми во сонот, ноќно мокрење, агресија, апатија и така натаму. Децата од ликовите во цртаните филмови и телевизиските серии, избираат свои омилени ликови херои, кои влијаат на нивниот идентитет и претстава за самите себе и често сакаат да ги имитираат во своето однесување. Затоа прикажувањето насилство може да поттикне насилно однесување и кај децата, особено на порана возраст. Кога се подготвуваат одредени програми, мора да се земе предвид начинот на кој ќе се прикажат одредени состојби и како тие ќе влијаат врз децата ако дојдат во контакт со нив – истакнува Зенговска.
Целата сторија на – slobodenpecat.mk
