Велика Британија побара ослободување за возрасниот Британец, Карл Андре, кому му се заканува казна од 350 удари со камшик, откако кај него во Саудиска Арабија било најдено домашно вино.
Семејството на уапсениот Британец изјавува дека пресудата може да го убие, пренесоа британските медиуми.
Андре (74) во август 2014 година беше затворен на една година, но тој и натаму се наоѓа зад решетки во очекување на уште една казна затоа што ги прекршил строгите саудиски закони што забрануваат чување и консумирање алкохол.
-Имаше две пресуди. Едната, лишување од слобода, истече во август, а втората се ударите со камшик, за радио Би-Би-Си изјави синот на Карл, Сајмон Андре.
„Немаме никаква претстава како работите ќе се развиваат. Не ја критикуваме Саудиска Арабија затоа што такви се нејзините закони, тоа е нивниот начин на живот. Мојот татко ја одлежа казната, изрази жалење за тоа што се случи, и едноставно сака да си дојде дома“.
Сајмон Андре изјави дека неговиот татко, кој во последните 25 години работил за нафтени компании во Саудиска Арабија, не е во добра здравствена состојба, бидејќи три пати заболувал од рак и има астма.
-Тој е возрасен и слаб човек и стравувам дека оваа казна со ударите со камшик е потенцијална смртна казна за него, рече синот.
Британското Министерство за надворешни работи соошти дека вложува напори за негово ослободување.
