Бурни реакции кај сточарите предизвика веста на Агенцијата за храна и ветеринарство дека кај десет млекарници се утврдени неправилности во однос на квалитетот и означувањето на млечните производи што се продаваат во маркетите. Сточарите уште пред три месеци кога министерот Цветан Трипуновски беше во Битола му кажаа дека наместо млеко граѓаните пијат „хемија“. Сега заради сериозноста на проблемот особено со ставањето на палмино масло во млечните производи сточарите барат АХВ јавно да ги обелодени сите млекарници и да им ги одземе правата да произведуваат млечни производи, а не како што велат да ги казнува со смешни казни од по неколку илјади евра.
Голема измама на потрошувачите откри Агенцијата за храна и ветеринарство (АХВ) по спроведените вонредни инспекциски контроли во поголемите синџири маркети низ земјава. Официјалните ветеринари подигнале вкупно 91 мостра од млеко, млечни производи и сувомеснати производи (од домашно производство и од увоз) за да утврдат дали нивниот реален квалитет соодветствува со она што е напишано на декларациите.
Првичните резултати за млечните производи се поразителни: кај голем дел од операторите е откриено сериозно мамење на купувачите преку вештачко „осиромашување“ на производите и користење евтини растителни замени.
Од лабораториски анализираните 45 мостри од млеко и млечни производи, дури кај 10 оператори со храна е утврдено дека производите не одговараат на Правилникот за квалитет. Наместо ветената хранлива вредност, во овие производи бил изменет соодносот на мастите во корист на водата и евтините суровини.
Најдрастичниот пример е откриен кај еден производител, каде при тестирање на мостра од ситно сирење било утврдено дека на декларацијата пишувало 20% млечна маст, а реално производот содржел само 1 процент млечна маст! Станува збор за класично „продавање магла и вода“ спакувано како млечен производ. За овој прекршок, на операторот му е изречена парична казна од 3.500 евра, а запленети се 22 килограми од спорното сирење.
Поради слични отстапки и лажирање на процентот на млечни масти, уште осум други оператори (производители и увозници) заработија казни од по 1.050 евра за измама на потрошувачите.
