Градоначалникот на грчкиот град Кавала, Костис Симитис, минатата недела одлучи да обезбеди училници во основните училишта за децата на доселениците-Албанци што се родени во Грција да можат да го учат својот мајчин јазик.
Како што јави агенцијата „Грик репортер“, часови по албански јазик, основани на иста образовна програма како во Албанија, ќе се одржуваат секоја сабота за деца од шест до 14 години.
Симитис за државната агенција АНАМПА рекол и дека интеграцијата на доселениците во Грција е важно прашање за општеството и затоа Кавала ја презела таа иновативна иницијатива.
Македонците од леринското село Овчарани, пак, сега излегоа со поинакво барање. Имено, тие собраа двесте потписи, а градоначалникот Панајотис Анастасијадис на 26 март ја доставил петицијата во регионалната канцеларија за образование и до градоначалникот на Лерин.
Со петицијата бараат да се официјализира македонскиот јазик во училиштата, а сите топографски имиња и називи на објекти во општината да бидат испишани на македонски и на грчки јазик.
Професорката Татјана Каракамишева-Јовановска објаснува дека Европската Унија нема посебни механизми со кои може да ги натера своите членки да ги почитуваат барањата на малцинствата.
– Службената употреба на јазикот е уставна материја и самата земја си проценува дали ќе дозволи употреба на втор службен јазик и во која сфера и во кои области – вели Каракамишева.
Професорката објаснува дека доколку ваквото барање биде одбиено, Македонците ќе може да се пожалат до Европскиот суд за човекови права, но дека судот не може да ѝ наложи на Грција да ја почитува одлуката, туку, како што додава, вообичаено сѐ се сведува на материјална отштета.
Nova Makedonija
