Шумахер ја повредил главата во скијалиштето Мерибел, откако удрил со главата во карпа, но носел кацига, поради што ударот бил ублажен.
Тој веднаш потоа бил пренесен со хеликоптер во болница во Гренобл, каде му била извршена операција поради крварење во мозокот.
Според најновите информации, кои италијанскиот новинар Танкреди Палмери ги пренел на Твитер, Шумахер по оперативниот зафат е во кома и се наоѓа во критична состојба.
Во Гренобл дошол и невролог од Париз за да ја прегледа легендата на Ф1, а пред болницата се собрале десетина обожаватели на Шуми за да му пружат поддршка.
Полицијата ја истражува причината за несреќата, а медиумите пренеле дека Шумахер скијал надвор од стазата со својот 14-годишен син.
Неговата сопруга и двете деца дошле во болницата, а според најновите информации објавени околу 22:30, потврдено е дека е во критична состојба, а тоа го пренеле и најголемите светски медиуми.
