Договорот од Пржино останува добра основа за надминување на политичката криза во земјата, а одлуката за тоа треба да ја донесат граѓаните, односно политичките лидери во земјата, изјави во средата американскиот амбасадор Џес Бејли кој присуствуваше на завршниот настан на проектот на УСАИД за меѓуетничка интеграција во образованието, пренесува А1он.
„Зборувавме за ова многу пати, не знам дали има Пржино еден, два, три… Имавме систем поставен од мај до јули 2015, кој предвидуваше кризата да се разреши со враќање во Собранието, со создавање услови за добри и фер избори, со справување со прашањето на неовластено прислушуваните разговори, како тие настанале и што откриваат, и потоа да продолжиме со реформските приоритети. Сметам дека тоа останува добра основа за да одиме напред. Ако ги погледнете овие елементи, мислам дека може да видите начин како да одиме напред“, рече Бејли запрашан од новинарите за сугестија за разрешување на кризата и дали „Пржино 3“ е опција.
Американскиот амбасадор посочи дека, сепак, одлуката за тоа е на политичките лидери во земјата.
„Ние остануваме партнер и пријател на Македонија, сакаме да помогнеме процесот да се движи напред, но на крајот на денот се зависи од вас, од граѓаните, од вашите лидери, да профункционираат демократските институции. Има тензии во општеството, има поделби, и важно е институциите да ги приближуваат граѓаните заедно“, додаде Бејли.
На новинарско прашање во врска со доделувањето на мандатот за формирање нова влада тој повтори дека очекуваат претседателот Иванов да ја преиспита неговата одлука.
„Мислам дека неколку пати дадовме коментар во врска со одлуката на претседателот Иванов. Сметаме дека тоа не беше правилна одлука и се надеваме дека ќе ја преиспита. Мислам дека е важно демократските институции да функционираат и во тоа се содржани решенијата“, истакна американскиот амбасадор.
