Бројката на заболени од корона вирусот во Македонија достигна 219. Во изминатото деноноќие, од вкупно 18 новорегистрирани случаи, 11 се од Скопје, четири од Прилеп, во Куманово се потврдени два нови случаја и уште еден во Тетово.
Бројката на починати и излекувани останува непроменета информира министерот за здравство Венко Филипче и додаде дека простор за манипулација со бројките нема. Од новозаболените има и уште еден здравствен работник, вработен во Клиниката за кардиологија.
Од хоспитализираните, вкупно 41 пациент, ниту еден не е поставен на респираторна машина, иако има 7 потешки случаи, 27 средно-тешки и 7 со поблаги симптоми. Инаку, од вторникот во првата борбена линија против корона вирусот застанаа матичните лекари, а ним денеска им е поделена и заштитна опрема. Во случај на драстично зголемување на пациентите, Филипче откри дека во функција ќе биде поставена и мобилна болница, лоцирана веднаш до Инфективна.
Според министерот добро е што линеарно се зголемува бројот на новозаболени, приближно е ист секој ден и не расте нагло. Од Министерството соопштија и дека се обезбедени и 55 респираторни машини, од кои 25 преку Обединетите нации со норвешки пари и 30 кинески, набавени преку УНДП, со средства на ЕУ.
