Србин и Хрват биле уапсени на граничниот премин Табановце кога цариниците откриле дека автомобилот „бмв“, што го управувале, бил украден и поседувале фалсификувани австриски сообраќајни документи.
Полицијата против З.М. (39) од Србија и против Хрватот А.Ѓ. (27) поднела кривична пријава за фалсификување исправа. Истражен судија им одредил притвор од 30 дена.
Истрагата утврдила дека двајцата во март годинава во Србија украле автомобил „бмв“, по што го отстраниле оригиналниот фабрички број на шасијата на возилото и вметнале друг број.
Потоа од непознато лице набавиле фалсификувана табличка со австриски национални ознаки и ја поставиле на возилото. Двајцата набавиле и бланко-австриска сообраќајна дозвола и меѓународна карта за осигурување на возилото. Минатиот четврток Србинот и Хрватот дошле на граничниот премин Табановце за влез во Македонија и се јавиле за пасошка контрола.
