Мнозинството пратеници во бугарскиот парламент гласаа за измени во Законот за работни односи, односно за преименување на националниот празник 24 Мај.
Во пресрет на парламентарните избори во соседна Бугарија кои се закажани за на пролет идната година, владеачките „Обединети патриоти“ на секој начин се обидуваат да добијат политички поени.
Додека Владата се соочува со повеќемесечни протести, „ГЕРБ“ на Бојко Борисов и „ВМРО“ на Красимир Каракачанов ја засилија националистичката реторика кон Македонија и со контроверзни барања несоодветни за 21-ви век ги блокираа пристапните преговори на земјава со Европската унија.
Деновиве, коалицијата повлече уште еден потег, кој според тамошната опозиција има за цел да го одвлече вниманието на бугарското општество од актуелните проблеми.
Со измените на Законот за работни односи, празникот 24 Мај, од Ден на бугарското образование, култура и словенско писмо се преименува во Ден на светите браќа Кирил и Методиј, за бугарската азбука, образование и култура и за словенската литература.
Според „Обединетите патриоти“, терминот „словенско писмо“ бил измислен од Комунистите пред неколку децении.
Георги Гоков од БСП се спротистави на измените на законот истакнувајќи дека Законот за работни односи не може да реши историски спорови. На тоа му возвратија од владеачката коалиција, истакнувајќи дека ставот на БСП е ист со изјавата на рускиот претседател Владимир Путин кој неодамна истакна дека словенското писмо доаѓа од Македонија.
