Кралицата на Обединетото Кралство Елизабета по повод Денот на независноста на Република Македонија упати честитка до претседателот на државата Ѓорге Иванов.
– Ми причинува големо задоволство да Ви испратам најтопли честитки за прославата на вашиот Ден на независноста, заедно со моите најдобри желби за среќа и напредок на народот на Македонија во годината што престои, се наведува во честитката објавена на фб-профилот на Британската амбасада.
Воедно, се посочува, Република Македонија и Велика Британија воспоставија дипломатски односи на 16 декември 1993 година. – Во 23-те години од тогаш заедно изградивме партнерство базирано на соработка и на отворено и искрено пријателство, се посочува во текстот кон честитката.
Воедно, амбасадорот на Велика Британија во земјава Чарлс Гарет денеска беше дел од претставниците на дипломатскиот кор кои по повод Денот на независноста се поклонија и положија цвеќе пред Споменикот на паднатите херои во паркот Жена-борец.
