Државата ќе го плати лекувањето на Тамара Димовска во странство, девојчето кое има вродена болест на рбетот. Ова го вети министерот за здравство Никола Тодоров. Вели дека министерството и фондот целосно ќе ги покријат трошоците кои се потребни за третманот кој ќе го спаси детето од траен инвалидитет.
Родителите на Тамара побараа помош откако Фондот одби да им одобри операција во странство со образложение дека девојчето може да се оперира на клинички иако поради сложеноста на случајот ниту еден доктор од таму не се нафати на ова.
Според неофицијални информации токму министерството забранило сите вакви случаи да се праќаат во странство со образлозение дека се чека да се отвори центар за лекување на сколиоза. Но, и министерот и директорот на фондот јавно признаа дека не се сигурни дали центарот ќе има капацитет за вакви тешки операции.
Под притисок на јавноста министерството попушти и најави позитивен исход. За ова се уште не се информирани родителите кои очекуваат дека во следните денови процедурата ќе се забрза за што побргу Тамара да стои исправена.
