Здружението „Градиме иднина“ денеска ќе му го предаде новиот дом на велешкото семејство Давчевски.
Станува збор за куќа на улицата „Наце Димов“ број 62 во Велес, на која „Градиме иднина“ целосно ги заврши градежните работи со поддршка на хумани граѓани и компании.
Како што информира Здружението, при подготовката на новиот дом се поставени кров, дрвена конструкција, керамиди, нова електрична инсталација, како и плочки во санитарниот чвор, кујната и ходникот. Извршено е машинско малтерисување и е монтирана целата санитарија. Куќата е и целосно опремена со мебел и други предмети од домаќинството.
Куќата на семејството Давчевски беше опожарена на 1 ноември 2014 година. Додека траеше изградбата на новиот дом, Давчевски беа сместени во селото Теово.
