Европските земји кои ќе одбијат да преземат дел од товарот од бегалската криза ќе мора да платат околу 250.000 евра по бегалец, објавија „Фајненшл тајмс“ и „Политико“, нагласувајќи дека тоа е предвидено со новиот предлог на Европската комисија, кој денеска ќе биде претставен.
Станува збор за казнена одредба, што е еден од најспорните делови на предложената измена од „Даблинскиот систем“, истакнаа неименувани европски претставници.
Постои можност за оваа мерка да се расправа и во следните денови и одредбата да биде изменета.
„Политико“ исто така укажува дека европските земји, кои ќе одбијат соработка, ќе мора скапо да платат.
Според документот во кој увид имала агенцијата АР, казните, наречени „придонес на солидарноста“, би можеле да изнесуваат по 250 илјади евра за секој барател на азил кого некоја земја ќе одбие да го прими.
Прописите на Унијата предвидуваат бегалците да аплицираат за азил во првата земја од ЕУ каде тие ќе пристигнат. Практично ова значи во Грција или Италија, со што двете земји се преоптоварени од големиот број на бегалци. Новиот план на Европската комисија треба да биде прифатен од страна на земјите членки и од европратениците.
