Откако претседателот на ВМРО-ДПМНЕ Христијан Мицкоски го исклучи Митко Јанчев заедно со другите пратеници кои гласаа „ЗА“ уставни измени, се шпекулира дека Антонио Милошоски ќе ја презеде потпретседателската функција на партијата.
Според сознанијата на весникот Независен, со Милошоски е договарано тој да биде нов потпретседател на партијата, односно да го заземе местото на разрешениот Митко Јанчев. Се калкулира дека поранешниот министер има големо искуство во политиката, добро ја познава пратеничката практика и процедура, а како предност му се зема и тоа што прв од вмровската група јасно и без двоумење се изјасни дека ќе го бојкотира референдумот.
„Немам коментар“, одговори Милошоски на прашањето дали е точно дека ќе стане трет потпретседател на ВМРО-ДПМНЕ, заедно со Александар Николоски и со Владо Мисајловски.
Во изјава за 1ТВ Јанчев потврди: „Не сум излезен од партијата, не може мене Мицкоски да ми понуди да се вратам, бидејќи имам намера јас да ја водам партијата“, а од друга страна „Независен“ пренесува дека Милошоски одбил да коментира дали ќе ја презеде функцијата, иако тој има големо искуство во политиката, ја познава пратеничката практика и процедура и без двоумење се изјасни дека ќе го бојкотира референдумот.
Од опозициската ВМРО-ДПМНЕ се уште нема потврда за тоа кој ќе ја преземе оваа функција.
