На 29 ноември би требало да се дознае која историска личност е погребана во Амфиполис каде што веќе неколку месеци се истражува досега најголемата античка гробница најдена во Грција. На тој ден е закажана прес конференција на Катерина Перистери, археолог, задолжена за ископувањата.
Министерството за култура на Грција денес објави дека археолозите го извадиле скелетот на историската личност погребана на ова место и сега ќе се работи на идентификација на остатоците. 
“Станува збор за моќна личност ако се суди според посебноста на оваа голема гробница”, вели соопштението на министерството.
Гробницата датира од времето на Александар Македонски (356-323 година пред Исус Христос). Таа има дијаметар од 500 метри и две импозантни сфинги, на подот има мозаик, потоа две каријатиди високи два метри и голем мозаик на кој се претставени Персефон и Плутон. 
Се шпекулира дека погребаната личност е една од најблиските на Александар па дури можеби и неговата сопруга Роксана или мајка му Олимпија.
Многумина се надеваат дека личноста е можеби и самиот Александар но според експертите шансите за тоа е многу мали. Александар починал на 32 години во Вавилон и, според некои податоци, е погребан во Александрија во Египет иако и оваа хипотеза никогаш не била потврдена со некои археолошко истражување.
