Патнички авион на малезиската компанија „Малезија ерлајнс“ мораше денеска принудно да слета на аеродромот во Хонг Конг, поради проблеми во снабдувањето со струја.
Авионот Ербас 330-300 со 271 патници полетал од малезискиот главен град Куала Лумпур, за Инчун во Јужна Кореја, кога во реонот над Јужното Кинеско Море се појавиле проблеми со генераторот за снабдување со струја. Екипажот не успеала да се справи со проблемите во леталото,па побарала дозвола за принудно спуштање во Хонг Конг.
Авионот успеал безбедно да слета, откако останал целосно во мрак, но патниците морале да останат на свооте седишта уште извесно време, пред да им биде дозволено да го напуштат леталото.
Според хонгконшките аеродромски власти, покрената е истрага за овој инцидент, но се верува дека причината за проблемите ги предизвикал дефект на генераторот за струја. Авионот се уште се наоѓа на аеродромот.
Една британска патничка, која била во „Ербасот“ изјави за лондонските весници дека прво се слушнале некакви „необични звуци“ во кабината на авионот, а потоа „чудно крцкање“ по што кабината останала без светло.
– Сите помисливме дека ни нема спас, кога членовите на екипажот ни рекоа да ги ставиме на себе појасите за спасување,затоа што авионот ќе атерира на морската површина„-вели оваа патничка.
Авионот сепак успеал да го продолжи летот до Хонг Конг и да атерира на тамошниот аеродром.
