Новогодишната прослава оваа година ќе се одржи пред триумфалната капија „Порта Македонија“ затоа што на централниот плоштад „Македонија“ се одвиваат градежни работи кои го прекопуваат теренот за одново да се поплочи и за да се постави нова фонтана. Наместо на просторот помеѓу Камени мост и улица Македонија, оваа година прославата ќе се одржи на улицата помеѓу Портата и Собранието.
Ова вчера го изјави градоначалникот на Град Скопје, Коце Трајановски. Градот секоја година го организира овој централен новогодишен настан, но ова е прв пат пречекот да не се одржи на главниот плоштад. Се уште не е познато кои музичари ќе гостуваат и кој ќе ги забавува скопјани, но овие информации и онака не се дознаваат до последен момент.
Градот секоја година одвојува околу 150.000 евра за украсување и декорирање на главните сообраќајници и плоштади и речиси секоја година за тоа е задолжена фирмата „Линк медиа плус“. Оваа година, се уште не е склучен договор со фирма која би ја извршила набавката.
